CAP honrando Margareth Abraham, un berdadero héroe

Willemstad, 2 di mei 2024.

Tur aña, 2 di mei ta trese rekuerdonan ku sintimentu miksto pa esnan ku tabata serka di e eventonan riba e dia fatal ku Sra. Margareth Abraham a abordá loke lo a bira su último buelo. Esaki ta keda un evento impaktante pa nos industria lokal di aviashon, i asta mas ku sinku dékada despues, ainda esaki ta kousa gran tristesa na su sernan kerí i tur ku tabata konos’é.

Margareth Abraham tabata un di e stewardessnan riba e buelo di ALM 980 saliendo for di aeropuerto internashonal JFK di New York pa St. Maarten, dia 2 di mei 1970. El a pèrkurá pa e seguridat di hopi pasahero promé ku e avion a baha riba laman serka di kosta di St. Croix. El a pone nan bida na promé lugá, i lamentablemente el a pèrdè su mes bida. Margareth Abraham, kende tabatin 24 aña, a keda honrá dor di nombra e adrès di nos aeropuerto na su nòmber: Plasa Margareth Abraham.

“Tin asina tantu kos di e historia akí ku nos ke preservá i sigurá ku lo e sigui keda kontá pa generashonnan benidero. Su akto noble no tin mag di ser lubidá nunka. Nos ta kere ku esaki ta muchu mas ku solamente un evento trágiko”, asina Sr. Jonny Andersen, CEO di CAP a bisa.

P’e motibu akí, durante un seremonia spesial dia 2 di mei 2024, konmemorando e 54 aniversario di su fayesimentu trágiko, CAP orguyosamente a desvelá un mural koutivante honrando Margareth Abraham. Situá prominentemente riba e fachada di aeropuerto pafó di e Sala di Yegada, e mural pintá pa nos artista lokal Bagira, ta mustra detayadamente e kara di Margareth basá riba un di su portrètnan faborito. Ademas, e mural ta inkorporá un QR code lokalisá na man drechi, kual ta hiba tur esnan ku mira e mural na e webpage dediká di CUR, p’asina por siña mas tokante Margareth su historia remarkabel: https://curacao-airport.com/history-margareth-abraham/

Durante e seremonia di konmemorashon, e lista di oradónan a inkluí figuranan notabel manera Sr. Jeffrey Abraham, representando e famia komo e yu hòmber mas chikitu di e defuntu ruman hòmber ohochi di Margareth, Carol Abraham, i tambe Sr. Tobias ‘Tito’ Cordeiro, e úniko steward sobreviviente di e buelo. Ademas, Sr. Robby Schouten, prometido di Margareth, kende ta biba den eksterior, a manda un mensahe di video for di su kurason, kual a ser pasá durante e seremonia. Alabes Sra. Margy Bond, Kònsùl General di Merka, Sr. Ruisandro Cijntje, Minister di Desaroyo Ekonómiko i Sr. Charles Cooper, Minister di Tráfiko, Transporte i Planifikashon Urbano tambe a duna spich durante e seremonia.

E desvelo tan sperá di e mural a ser hasí pa Sr. Jonny Andersen huntu ku Sr. Wilhelmus Ignacio, Direktor General di Curaçao Airport Holding, Promé Minister Sr. Gilmar Pisas i Minister Cijntje. Ademas, Sr. Andersen a presentá un mini-pintura, un réplika di e mural, na Sr. Jeffrey Abraham, komo representante di e famia di Margareth. E gesto akí ta sigurá ku nan tin un réplika di e mural pa balorá i apresiá den nan kas.

E plaka ku e Presidente di Merka di e tempu ei, Sr. Richard M. Nixon, a manda pa Margareth su famia komo un homenage di gratitut na dje, a keda trasladá temporalmente pa e Sala di Yegada, miéntras CAP ta hasi adaptashonnan pa duna esaki un lugá nobo permanente i prominente den e Terminal. E plaka tabata dòrná ku flornan bunita, i tur esnan presente tabatin e oportunidat pa pasa atmir’é i lesa su inskripshon.

Sr. Andersen a konkluí e evento ku un anunsio sorpresa, bisando ku ya a kuminsá ku kreashon di un dokumental tokante Margareth Abraham, dirigí pa nos propio kontadó di historia lokal i direktor ekstraordinario, Selwyn de Wind. E inisiativa kuidadosamente planiá akí, ku tin komo meta pa inmortalisá Margareth su legado, ta trata na sigurá ku su historia remarkabel ta sigui biba pa generashonnan benidero. E première di e pelíkula ta planiá pa 2 di mei 2025, ku ta marka e 55 aniversario di su fayesimentu trágiko, i lo tuma lugá na The Movies Otrobanda. Ademas Sr. Andersen a ekspresá su gratitut di kurason na Sr. Wilhelmus Ignacio, Direktor General di Curaçao Airport Holding (CAH), pa su sosten balioso komo un di e partnernan di e dokumental akí. Sin a duda niun momentu, Sr. Ignacio mesora a aseptá e oportunidat ora el a keda aserká tokante su enbolbimentu den e proyekto akí.

Ku inisiativanan manera e mural, e dokumental, i ponementu di su plaka na un lugá prominente den terminal di aeropuerto, e legado di Margareth Abraham lo sigui inspirá i resoná pa añanan benidero.